Op 17 septimber wie it dan safier. Salsafamke is no as harkboek te keap.

Hanneke de Jong - Salsafamke, 4 cd's € 13,50
Dizze jeugdroman giet oer Freya, in famke fan 14 dat op fakânsje meisleept wurdt troch de omstannichheden. It dûnsjen fan de salsa jout it libben in hegere fersnelling. Thús blike de gefolgen en dan is beppe in grutte stipe, al moat Freya it (mei help fan oaren) wol sels oplosse. It hiele libben is net ien dûnsfeest, mar de salsa sil se net wer loslitte.
Salsafamke is ynlêzen troch Antsje van der Zee.

Salsafamke hat yn 2010 de Simke Kloostermanpriis krigen. Út it sjueryrapport:
De 14-jierrige Freya is foar it earst mei har âlden en har broerke op it tropyske Curaçao omdat har broer dêr staazje rint. Se komt yn ’e kunde mei Guido, de maat fan har broer. As se mei him de salsa dûnset wit se al gau: him wol ik ha, it kin neat skele wat ik dêrfoar dwaan moat. As se werom is yn Nederlân fernimt se dat se yn ferwachting is. Omdat se neat oan har mem hat, giet se nei har beppe ta en freget om rie: moat ik abortus dwaan litte of net?
Yn dit boek wurdt de românse fan Freya mei Guido prachtich moai, sfearfol eroatysk beskreaun. Tsjin it fakânsjedekor fan Curaçao wurde de gefoelens fan Freya foar en har langstme nei Guido oprjocht en natuerlik werjûn. De ûnfeilige relaasje mei har mem en de waarmte dy’t se by har beppe fynt binne ynteger en oprjocht beskreaun.

Moanne fan it Fryske Boek

16 sept - 16 okt