Maitiidsgroetnis, Jan en Marja Schotanus

nijsbrief

22 april 2013

Harkboeken heale priis!

Alle audioboeken fan Audiofrysk binne online foar de helte fan de priis del te laden by Luisterrijk. In ideale gelegenheid om yn de kunde te kommen mei de folle breedte fan ús oanbod. Keapje de roman De Mjitte fan Koos Tiemersma no foar 7,50, Feroaring fan lucht fan Rink van der Velde foar 6,50 of Skoare by FC Top fan Jelle Bangma, foar mar 4 euro!
De aksje duorret oant en mei 28 april.

Harkboek DE MOAISTE MEARKES FAN GRIMM is klear!

Anne Tjerk Popkema hat it mearke De wolf en de sân geitsjes nochris op 'en nij ynlêzen om 't syn stim by de earste kear, troch ferkâldheid, krekt te folle klonk as in wolf.

No is de útjefte klear en wurdt er op de website en yn de winkels oanbean. Ynkoarten giet it harkboek ek nei Luisterrijk om as download beskikber te kommen.

De hiele moanne april binne twa mearkes fergees beskikber fia de downloadside fan Audiofrysk, dit yn ferbân mei it Jier fan it Foarlêzen. Op de website fan It Frysk Bernboek wurdt hjir it hiele jier oandacht oan bestege.

Ynterview yn it Friesch Dagblad

Abe de Vries hat foar it deiblêd in ynterview ôfnommen, dat hjoed (moandei 22 april) yn de krante stiet. Frâns Andringa makke de foto. Wy hiene pland dat dy yn de nije túnkeamer makke wurde soe, mar hy fûn de romantyske sfear yn it ynterieur fan Marja dochs krekt noch even moaier. Sjoch hjirnjonken it resultaat.
It hiele artikel is nei te lêzen by Yn de Media.

Studio Súdwest

Yn april start de gearwurking fan Audiofrysk mei Omrop Sudwest-Fryslân. Op de sneintemoarn fan 8 oant 9 hat omropper Hans Bouwsma in programma mei ferhalen, gedichten en muzyk. Hjir sil ek materiaal fan Audiofrysk brûkt wurde. It earste boek dat hielendal útstjoerd wurdt, is De Fûke, fan Rink van der Velde, ynlêzen troch Sjoerd van Beem.

See, see, do wide see

It sympoasium See, see, do wide see yn Harns wie in moai sukses. Sa'n 70 beteljende gasten hearden in nijsgjirrige ynlieding fan Meindert Schroor oer Fryslân en de see, in relaasje dy't problematysk is...

En dêrnei folgen trije lêzings:

Nanne Kalma oer de see yn lietteksten, Tryntsje van der Steege oer de rol fan de see yn it proaza en Bert Looper oer de see yn de poëzij. De muzyk fan Nanne en Ankie, en fan Hein Jaap Hilarides makke de middei ôf.

Audiofrysk hat opnamen makke en no is it harkboek klear. It is al wer it tredde yn de rige Sirkwy Sympoasia, dit kear mei fjouwer lêzings op twa cd's.
Ynkoarten is See, see, do wide see ek by Luisterrijk del te laden.

boek@audiofrysk.nl