Nijsbrief augustus 2024

Dizze simmer is de produksje by AUDIOFRYSK gewoan trochgien

It resultaat:
Fan Meindert Bylsma is in speurdersoman ynlêzen troch Sjoerd van Beem en Geartsje de Vries hat de mânske roman Spegel en sonde fan Jetske Bilker opnommen.

Jetske Bilker - Spegel en sonde

As toskedoktersassistinte Doutsen (echtgenoate, mem en minneres) in nije baas krijt, giet der ynienen in soad mis. Om’t se it iene nei it oare ferjit, minsken net mear werkent en regelmjittich it paad bjuster is, rekket se yn panyk. Se driget de kontrôle oer har libben te ferliezen en lit it yn har omgean har eardere berop fan keunstner wer op te krijen.
As Anniek, har suster dy’t se tsientallen jierren net troffen hat, kontakt opnimt, komt alles yn in streamfersnelling en komme dingen oan it ljocht dy’t Doutsen har hiele libben ferswijd hat. Wat is der eins bard yn it ferline?

Op meinimmende wize fertelt Jetske Bilker dit oangripende, en bytiden humoristyske ferhaal oer geheugen, de eangst foar alzheimer en famyljebannen.

Fan Jetske Bilker (1960) ferskynde earder û.o. It libben fan in oar, dat nominearre waard foar de Gysbert Japicxpriis. Yn 2023 krige se yn Boalsert dy priis útrikt foar Spegel en sonde.

Meindert Bylsma - Moard yn ’e hite hei

Stikje by bytsje draait er it nei him ta. Swier giet it, hiel swier. Mar snoer en angel hâlde it. Hoeden dirigearret er de boel nei de ein fan ’e steger en sa nei de wâl. Der komt in stikje fan in sek omheech. Dêr is de heak yn fêst slein. Hy kin de sek fêstpakke. Troch de reidwâl hinne hyst er him heal op ’e wâl. Der sit noch fan alles ûnder. En dan sjocht er ynienen wat it is. Syn hert slacht sawat op ’e rin.

Resersjeurs Liuwe Bekkema en Lukas Roosjen, op it buro ‘de Blomkes’ neamd, krije in melding. Wiggele Kingma is de ôfrûne nacht net thús kommen. No bart dat wol faker, mar diskear fine se in plasse bestjurre bloed yn syn skuorre. En it docht bliken dat der hiel wat minsken binne by wa’t dizze boer op in tige minne namme leit. Yn har syktocht nei de wierheid komme der mear liken út de kast. De Blomkes moatte alles op alles sette om de wierheid te efterheljen. En dan is it by eintsjebeslút dochs wer hiel oars as dat it yn it begjin like.

Dit is it twadde diel yn de searje plysjeromans mei de filosofearjende plysjemannen Bekkema en Roosjen yn de haadrol. Bylsma toant him in boeiend ferteller, mei each foar detail en in humoristyske ynslach.

Noch even weromsjen op BIS

Sa’t jo faaks witte, is Audiofrysk wiis mei BIS, it berne-iepenloftspul yn Easterwierrum dat alle jierren in grutte ploech bern yn beweging set.
Dit jier spilen se Lytse Pier en de flok fan it berne-iepenloftmuseum, en wat wie it wer in feestje! Wat in fleur en faasje en wat in talint! As beleanning krigen de bern in boek oanbean út de Traveliersrige: Fûgelfrij yn ’e canyon.

En wa wit sjogge wy oer in pear jier wer akteurs út dizze ploech op it toaniel yn de notaristún yn Jorwert, of by in oar iepenloftspul... Dy trochstreaming is der geregeld, tink bygelyks oan Nynke Laverman, en dit jier oan Mayte Veenstra, Siebo Boersma en Lútzen Rijpma.
Dizze trije jonge akteurs spylje, sjonge en dûnsje fol fjoer yn Bitterswiete Pil, dat op 6 septimber yn Jorwert yn premjêre giet. Ik kin it net litte om harren even oan it wurd te litten: (út in ynterview troch Idske Bangma foar Op ’e Skille):
[Wat de oerienkomsten en de ferskillen binne tusken BIS en Jorwert? Dêr hoege de trije net lang oer nei te tinken, se binne it aardich iens mei-inoar. Teäter meitsje mei in groep minsken dy’t wille hat. “We laitsje hiel wat ôf; dit jier is it ek sa’n noflike groep minsken, dat wie by BIS eartiids sa en no by Jorwert ek,” seit Mayte. By it Iepenloftspul Jorwert leit de latte fansels heger en is it profesjoneel, it hiele repetysjeproses is strak delset en oer alle saken fan de produksje wurdt hiel goed neitocht. “Mar in stik kin noch sa goed wêze, as de groep spilers net in klik hat en it repetysjeproses stûket, dan sjochst dat by de útfiering. Mar dit binne allegear sokke gedreven minsken en we hawwe wille mei-inoar,” seit Siebo. Lútzen: “Ek de band dy’t muzyk makket en it koar dat sjongt, binne echt sá goed. It publyk wurdt traktearre op in prachtige jûn.” Mayte: “De iepenloftspullen yn Fryslân binne moaie kultuereveneminten en it is prachtich dat it yn it Frysk is. Dat moat foaral stipe krije en bestean bliuwe. En we moatte de jongerein dêryn belûke.” Siebo: “Ik tink dat it publyk mei de mûle iepen op de tribune sit en ûnder de yndruk wêze sil fan it stik ‘Bitterswiete Pil’. It wurdt in megagrut spektakel!”]

De Sweltsjerige hâldt stân:

Noch folop te keap foar mar 9,95 it stik, en dat bliuwt sa:

De twadde rige

Keapje se by de boekwinkel of bestel rjochtstreeks by Audiofrysk

boek@audiofrysk.nl